Bladder Cancer (മൂത്രാശയ കാൻസർ)

മൂത്രാശയം

മൂത്രാശയം എന്ന അവയവത്തിന്റെ ഭാഗങ്ങളാണ് മൂത്രനാളം , വൃക്ക , മൂത്രസഞ്ചി .അടിവയറ്റിലെ മൂത്രം സംഭരിക്കുന്ന പൊള്ളയായ അവയവമാണ് മൂത്രസഞ്ചി. വൃക്കയിൽ നിന്ന് മൂത്രം മൂത്രസഞ്ചിയിലേക്കു എത്താനുള്ള കുഴലാണ് മൂത്രനാളം .മൂത്രാശയം എന്ന അവയവത്തിനു 4 പാളികളുണ്ട് . ആദ്യത്തെ പാളി മൂത്രാശയ കോശങ്ങൾ (യൂറോതീലിയം ), രണ്ടാമത് ലാമിന പ്രോപ്രിയേ , മൂന്നാമത്തത് ഡെറ്റ്റ്‌സർ മാംസ പേശി , നാലാമത് കൊഴുപ്പിന്റെ ബന്ധിത ടിഷ്യൂ .

മൂത്രാശയ കാൻസർ ആരംഭിക്കുന്നത് ആദ്യത്തെ പാളിയിലെ യൂറോതീലിയം കോശങ്ങളിലാണ് .പല കാരണങ്ങളാൽ യൂറോതീലിയം കോശങ്ങൾ ക്രമാതീതമായി വളരാൻ ആരംഭിക്കുകയും മറ്റു പാളികളിലേക്കും , അവയവങ്ങളിലേക്കും പടരാൻ തുടങ്ങും .

‍

സ്ഥിതിവിവരക്കണക്കുകൾ (statistics)

ഗ്ലോബോകാൻ 2020 കണക്കുകളനുസരിച്ചു മൂത്രാശയ കാൻസർ ഇന്ത്യയിൽ 17 സ്ഥാനത്താണുള്ളത് . ഒരു ലക്ഷം ആളുകളിൽ 3.57 പേർക്ക് വരാൻ സാധ്യതയുണ്ട് .

‍

അപകട സാധ്യത ഘടകങ്ങൾ (Risk Factors)

1. പുകവലി : മൂത്രാശയ കാൻസർ വരാൻ ഏറ്റവും സാധ്യത കൂട്ടുന്ന ഒരു ഘടകമാണ് പുകവലി .പുകവലിക്കാത്തവരെക്കാൾ 4 മുതൽ 7 മടങ്ങു സാധ്യത കൂടുതലാണ് പുകവലിക്കുന്നവരിൽ മൂത്രാശയ കാൻസർ വരാൻ .

‍

2. പ്രായം : പ്രായം കൂടുന്നതിനനുസരിച്ചു മൂത്രാശയ കാൻസർ വരാനുള്ള സാധ്യത കൂടിക്കൊണ്ടിരിക്കും .മൂത്രാശയ കാൻസർ വരുന്ന 70 % ആളുകളും 65 വയസിനു മുകളിൽ പ്രായമുള്ളവരാണ്.

‍

3.ലിംഗം (Gender):മൂത്രാശയ കാൻസർ വരാനുള്ള സാധ്യത പുരുഷന്മാരിൽ 4 മടങ്ങു കൂടുതലാണ്.

‍

4.രാസവസ്തുക്കൾ(Chemicals) : ചില വ്യവസായങ്ങളിൽ ഉപയോഗിക്കുന്ന രാസവസ്തുക്കൾ അവിടെ ജോലി ചെയ്യുന്നവരിൽ മൂത്രാശയ ക്യാൻസറിന് കാരണമായേക്കാം .തുണി, റബ്ബർ, ലെതർ, പെയിന്റ് , പ്രിന്റ് മുതലായ വ്യവസായങ്ങളിൽ ഉപയോഗിക്കുന്ന Benzidine , Beta Naphthalamine ,Arsenic എന്നിവ ഉദാഹരണമാണ് .

‍

5.വിട്ടുമാറാത്ത മൂത്രാശയ പ്രശ്നങ്ങൾ : തുടർച്ചയായ യൂറിൻ ഇൻഫെക്ഷൻ , വൃക്കയിലും മൂത്രാശയത്തിലും കാണപ്പെടുന്ന സ്‌റ്റോൺസ് , തുടർച്ചയായ കത്തീറ്റർ ഉപയോഗം എന്നിവ മൂത്രാശയ ക്യാന്സറിന്റെ സാധ്യത കൂട്ടുന്നു

‍

6.Personal History: മുൻപ് മൂത്രാശയ കാൻസർ വന്നിട്ടുള്ളവരിൽ മൂത്രാശയത്തിന്റെ മറ്റു ഭാഗങ്ങളിലും കാൻസർ വരാൻ സാധ്യത കൂടുതലാണ്

‍

ലക്ഷണങ്ങൾ

മൂത്രാശയ കാൻസർ പിടിപെടുന്ന എല്ലാ വ്യക്തികളിലും താഴെ പറഞ്ഞിരിക്കുന്ന എല്ലാ ലക്ഷണങ്ങളും കാണണമെന്ന് നിർബന്ധമില്ല .

‍

മൂത്രത്തിൽ രക്തം
മൂത്രം പോകുമ്പോൾ വേദനയോ പുകച്ചിലോ
കൂടെ കൂടെ മൂത്രം പോകുന്നത്
രാത്രിയിൽ എപ്പോളും മൂത്രം പോകണമെന്ന തോന്നൽ
മൂത്രം പോകണമെന്ന് തോന്നും എന്നാൽ പോകാൻ സാധിക്കുന്നില്ല
നാടുവിന്റെ താഴ് ഭാഗത്തായി ഒരു വശത്തു വേദന

‍

രോഗനിർണയം

മൂത്രപരിശോധന : മൂത്രത്തിൽ രക്തം കണ്ടാൽ മൂത്ര പരിശോധനയിലൂടെ കാൻസർ കോശങ്ങൾ മൂത്രത്തിൽ ഉണ്ടോ എന്ന് സൈറ്റോളജി ടെസ്റ്റിലൂടെ കണ്ടുപിടിക്കാവുന്നതാണ്
സിസ്റ്റോസ്കോപ്പി :മൂത്രാശയ ക്യാന്സറിനുള്ള പ്രധാന രോഗനിർണയ പ്രക്രിയയാണ് സിസ്റ്റോസ്കോപ്പി. നേർത്തതും പ്രകാശമുള്ളതും വഴക്കമുള്ളതുമായ ഒരു ട്യൂബ് ഉപയോഗിച്ച് മൂത്രാശയം പരിശോധിച്ച് , മൂത്രാശയത്തിലെ വളർച്ചകൾ കണ്ടുപിടിക്കാനും ബയോപ്സി എടുക്കാനും സാധിക്കും .
ബയോപ്സി :സിസ്റ്റോസ്കോപ്പി ചെയുമ്പോൾ അസാധാരണമായ വളർച്ച കണ്ടാൽ ഡോക്ടർ ഒരു ചെറിയ ഭാഗം മൈക്രോസ്കോപ്പിലൂടെ സൂഷ്മപരിശോധന ചെയ്യാൻ നീക്കം ചെയ്യുന്നതിനെയാണ് ബയോപ്സി എന്ന് പറയുന്നത് . ഈ പ്രക്രിയയെ TURBT (Transurethral Bladder Tumor Resection) എന്നും പറയപ്പെടുന്നു .
ഇമേജിങ് ടെസ്റ്റ്(Imaging Tests) : മൂത്രാശയ കാൻസർ എവിടെല്ലാം വളരുന്നുണ്ട് എന്നത് കണ്ടുപിടിക്കാൻ CT Scan, MRI Scan,PET Scan,Bone Scan ,Ultrasound Scan മുതലായ ഇമേജിങ് ടെസ്റ്റുകൾ നടത്തേണ്ടിവരും

‍

Bladder Cancer Staging

ക്യാന്സറിന്റെ വ്യാപ്തി മനസിലാക്കാൻ ഉപയോഗിക്കുന്ന സംവിധാനമാണ് സ്റ്റേജിങ്.കാൻസർ എവിടെയാണ് സ്ഥിതി ചെയുന്നത് , എവിടേക്കാണ് പടർന്നത് എന്നി വിവരങ്ങൾ സ്റ്റേജിങ് ഉപയോഗിച്ചാണ് വിവരിക്കുന്നത് .കാൻസർ ഏതു ഘട്ടം എത്തി എന്ന് മനസിലാക്കാൻ പല ടെസ്റ്റുകൾ ചെയ്യേണ്ടിവരും . ആദ്യത്തെ പരിശോധനയിൽ ശാരീരിക പരിശോധന മാത്രം ചെയ്തു സ്റ്റേജ് കണ്ടു പിടിക്കാൻ സാധിക്കില്ല. TNM ഉപയോഗിച്ചാണ് മിക്ക ക്യാന്സറിന്റെയും സ്റ്റേജ് വിവരിക്കുന്നത്.

T- കാൻസർ എത്ര വലുപ്പമുണ്ട് എവിടാണ് സ്ഥിതി ചെയുന്നത് . T എന്ന അക്ഷരത്തിനൊപ്പം 0 മുതൽ 4 വരെയുള്ള നമ്പർ ഉപയോഗിച്ചാണ് ഈ സ്റ്റേജിങ് അടയാളപ്പെടുത്തുന്നത്

Tx-പ്രാഥമിക കാൻസർ വിലയിരുത്താൻ സാധിക്കില്ല
T0-കാൻസർ ഉണ്ടെന്നതിനു തെളിവുകളില്ല
T1-കാൻസർ മൂത്രസഞ്ചിയുടെ ലാമിന പ്രോപ്രിയ എന്ന പാളിയിലേക്കു വ്യാപിച്ചിരിക്കുന്നു. എന്നാൽ പേശിയിലേക്കു എത്തിയിട്ടില്ല
T2a-മൂത്രാശയ ഭിത്തിയിലുള്ള പേശിയുടെ ആദ്യ പകുതി വരെ വ്യാപിച്ചിരിക്കുന്നു
T2b-മൂത്രാശയ ഭിത്തിയിലുള്ള പേശിയുടെ ആഴത്തിലേക്ക് (പുറം പകുതി) വ്യാപിച്ചിരിക്കുന്നു
T3a-കാൻസർ മൂത്രാശയ സഞ്ചിക്കു ചുറ്റുമുള്ള കൊഴുപ്പിലേക്കു പടർന്നിരിക്കുന്നു .
T3b- കാൻസർ മൂത്രാശയ സഞ്ചിക്കു ചുറ്റുമുള്ള കൊഴുപ്പിലേക്കു പടർന്നിരിക്കുന്നു .ഡോക്ടർ ശാരീരിക പരിശോധന നടുത്തുമ്പോ കണ്ടുപിടിക്കാൻ പറ്റുന്ന അത്രയും വലുപ്പമെത്തിയിരിക്കുന്നു
T4a-കാൻസർ പല അവയവങ്ങളിലേക്കും (പ്രോസ്റ്റേറ്റ് ,ഗർഭപാത്രം ,യോനി) പടർന്നിരിക്കുന്നു.കാൻസർ ശസ്ത്രക്രിയയിലൂടെ നീക്കം ചെയ്യാൻ ഈ ഘട്ടത്തിലും സാധ്യമാണ്
T4b-കാൻസർ പെൽവിക് ഭിത്തിയിലോ വയറിലെ ഭിത്തിയിലോ പടർന്നിരിക്കുന്നു .ഈ ഘട്ടത്തിൽ ശസ്ത്രക്രിയ സാധ്യമല്ല

N–കാൻസർ ഏതെല്ലാം കഴലകളിലേക്കു പടർന്നിരിക്കുന്നു എന്ന് കാണിക്കാനാണ് N സ്റ്റേജ് ഉപയോഗിക്കുന്നത്

Nx-പ്രാദേശിക കഴലകൾ വിലയിരുത്താൻ സാധ്യമല്ല
N0-കാൻസർ പ്രാദേശിക കഴലകളിലേക്കു വ്യാപിച്ചിട്ടില്ല
N1-പെൽവിസിലെ ഒരു പ്രാദേശിക കഴലയിലേക്കു കാൻസർ വ്യാപിച്ചു
N2-പെൽവിസിലെ രണ്ടോ അതിലധികമോ കഴലകളിലേക്കു കാൻസർ വ്യാപിച്ചു
N3-പെൽവിസിലെ പ്രധാന ധമനികൾക്ക് പിന്നിൽ , മൂത്രസഞ്ചിക്കു മുകളിലായി സ്ഥിതി ചെയുന്ന കഴലകളിലേക്കു കാൻസർ വ്യാപിച്ചു

‍

M-കാൻസർ ശരീരത്തിന്റെ മറ്റു ഭാഗങ്ങളിലേക്ക് വ്യാപിച്ചിട്ടുണ്ടോ എന്ന് സൂചിപ്പിക്കാനാണ് M സ്റ്റേജ് ഉപയോഗിക്കുന്നത്

M0-കാൻസർ വേറെ ഭാഗത്തേക്ക് വ്യാപിച്ചിട്ടില്ല
M1a-കാൻസർ പെൽവിസിന് പുറത്തുള്ള കഴലകളിലേക്കു മാത്രമാണ് വ്യാപിച്ചിട്ടുള്ളത്
M1b-കാൻസർ ശരീരത്തിന്റെ മറ്റു ഭാഗങ്ങളിലേക്കും വ്യാപിച്ചു

‍

ചികിത്സ

മൂത്രാശയ ക്യാന്സറിന്റെ ചികിത്സക്കായി സാധാരണ ഉപയോഗിക്കുന്ന ചികിത്സാരീതികൾ ചുവടെ വിവരിച്ചിരിക്കുന്നു

‍

1.ശസ്ത്രക്രിയ

ശസ്ത്രക്രിയ സമയത്തു ക്യാന്സറും ചുറ്റുമുള്ള കുറച്ചു ആരോഗ്യമുള്ള കോശങ്ങളും നീക്കം ചെയ്യുന്ന പ്രക്രിയയാണ് ഇതിൽ ഉൾപ്പെടുന്നത് . രോഗിയെ സംബന്ധിച്ച പല ഘടകങ്ങളും അവലോകനം ചെയ്ത ശേഷമായിരിക്കും ഏതു ടൈപ്പ് ശസ്ത്രക്രിയ വേണം എന്ന് ഡോക്ടർ തീരുമാനിക്കുന്നത് .

TURBT (Transurethral Bladder Tumor Resection) : പേശികളിലേക്കു പടരാതെ ആരംഭ ഘട്ടത്തിലുള്ള മൂത്രാശയ ക്യാന്സറിനാണ് ഈ ശസ്ത്രക്രിയ ചെയ്യാറ് . ആരംഭ ഘട്ടം ആണെങ്കിൽ കൂടി ശസ്ത്രക്രിയക്ക് ശേഷം കാൻസർ തിരിച്ചു വരാനുള്ള സാധ്യത കുറക്കാൻ Intravesical Therapy കൂടി ചെയ്യേണ്ടി വരും.
Radical Cystectomy and Lymph Node Dissection : മുഴുവൻ മൂത്രസഞ്ചിയും ഒരുപക്ഷെ അടുത്തുള്ള ചില ഭാഗങ്ങളും അവയവങ്ങളും നീക്കം ചെയ്യുന്നതാണ് ഈ ശസ്ത്രക്രിയ. കാൻസർ എത്രത്തോളം പടർന്നു എന്നതിനനുസരിച്ചു ചിലപ്പോൾ പ്രോസ്റ്റേറ്റ് ഗ്രന്ഥി ,ഗർഭപാത്രം , അണ്ഡാശയം ,ഫലോപ്യൻ ട്യൂബ് ,യോനിയുടെ ഭാഗം എന്നിവ ഉൾപ്പെടാം . എല്ലാ രോഗികൾക്കും പെൽവിസിലെ കഴല(Lymph Node) നീക്കം ചെയ്യപ്പെടുന്നു .കഴലകളിലേക്കു പടർന്ന കാൻസർ കണ്ടുപിടിക്കുന്നതിനായിLymph Node Dissection എന്ന ഈ പ്രക്രിയ നിർണായകമാണ് .
Urinary Diversion : മൂത്രസഞ്ചി മുഴുവൻ നീക്കം ചെയ്യേണ്ട സാഹചര്യം വന്നാൽ മൂത്രമൊഴിക്കാൻ പുതിയൊരു മാർഗം സൃഷ്ടിക്കുന്നതിനെയാണ് എന്ന് പറയുന്നത്. ചെറുകുടലിന്റെയോ വൻകുടലിന്റെയോ ഒരു ഭാഗം ഉപയോഗിച്ച് ശരീരത്തിന് പുറത്തേക്കു ഒരു മാർഗം ഉണ്ടാക്കി മൂത്രം ശേഖരിക്കാൻ ഒരു സഞ്ചിയും ഘടിപ്പിക്കുന്നു .

‍

Therapies Using Medication (മരുന്നുകൾ ഉപയോഗിച്ചുള്ള ചികിത്സകൾ ) ശരീരത്തിലുടനീളമുള്ള കാൻസർ കോശങ്ങളെ നശിപ്പിക്കാൻ മരുന്ന് രക്തത്തിലൂടെ കുത്തിവെക്കുന്ന പ്രക്രിയയാണിത് .ചിലപ്പോൾ ഗുളികയായും നൽകാറുണ്ട് .

മൂത്രാശയ ക്യാന്സറിനുപയോഗിക്കുന്ന മരുന്നുകളിൽ ഇവ ഉൾപ്പെടുന്നു

‍

2.Chemotherapy

Intravesical Chemotherapy: മൂത്രനാളിയിലൂടെ ഒരു കത്തീറ്റർ ഇട്ടു അതിലൂടെ മരുന്ന് മൂത്രാശയത്തിലേക്കു എത്തിക്കുന്നു .മരുന്നുമായി നേരിട്ട് സമ്പർക്കത്തിലുള്ള കാൻസർ കോശങ്ങളെ മാത്രമേ ഇതിലൂടെ നശിപ്പിക്കാൻ സാധിക്കു. മൂത്രാശയ ഭിത്തിയുടെ ഉള്ളിലേക്ക് പടർന്ന ക്യാന്സറും മറ്റു അവയവങ്ങളിലേക്കു പടർന്ന ക്യാന്സറിനും ഇത് ഉപകരിക്കില്ല .

Systemic Chemotherapy : സിസ്റ്റമിക് കീമോതെറാപ്പിയിൽ മൂത്രാശയക്യാന്സറിനു കൂടുതലായി ഉപയോഗിക്കുന്നത് താഴെ കൊടുത്തിരിക്കുന്ന മരുന്നുകളാണ്

Cisplatin and Gemcitabine
Carboplatin
MVAC (Methotrexate, Vinblastin, Doxorubicin and Cisplatin)
Dose dense(DD)-MVAC with growth factor support
Docetaxel or Paclitaxel
Pemetrexed

‍

ഒരു മരുന്ന് തന്നെയോ ഒന്നിലധികം മരുന്നുകൾ ഒരുമിച്ചോ കൊടുക്കാറുണ്ട് . കീമോതെറാപ്പിയുടെ പാർശ്വഫലങ്ങൾ വ്യക്തിഗത മരുന്ന് ,ഉപയോഗിക്കുന്ന ഡോസ് ,രോഗിയുടെ ആരോഗ്യനില എന്നിവയെ ആശ്രയിച്ചിരിക്കും . കൂടുതലായി കാണപ്പെടുന്ന പാർശ്വഫലങ്ങൾ ഛർദി , ക്ഷീണം , ഓക്കാനം ,വിശപ്പില്ലായ്മ ,രുചി മാറ്റം ,മുടികൊഴിച്ചിൽ ,വയറിളക്കം ,അണുബാധയ്ക്കുള്ള സാധ്യത ,രക്തസ്രാവം എന്നിവയാണ് .

‍

3.Immunotherapy

ക്യാന്സറിനെ പോരാടുന്നതിനായി കാൻസർ കോശങ്ങളെ ആക്രമിക്കാനുള്ള ശരീരത്തിന്റെ രോഗപ്രതിരോധ സംവിധാനത്തിന്റെ കഴിവ് മെച്ചപ്പെടുത്തുന്ന ചികിത്സയാണു ഇമ്മ്യൂണോതെറാപ്പി . ഇത് ഒരു ഭാഗത്തു മാത്രമായോ ശരീരത്തിൽ മൊത്തം എത്തുന്ന രീതിയിലും ഉപയോഗിക്കാം .

Local Immunotherapy

Bacillus Calmette-Guerin (BCG) :ക്ഷയരോഗത്തിനു കാരണമാകുന്ന ബാക്റ്റീരിയക്ക് സമാനമായ ബിസിജി(BCG) പോലെയുള്ള ദുർബലമായ ഒരു ബാക്റ്റീരിയയാണ് ഈ ചികിത്സയിൽ ഉപയോഗിക്കുന്നത് .ഒരു കത്തീറ്റർ ഉപയോഗിച്ച് ബാക്റ്റീരിയയെ നേരിട്ട് മൂത്രസഞ്ചിയിൽ സ്ഥാപിക്കുന്നു .ബിസിജി മൂത്രസഞ്ചിയുടെ ഭിത്തിയിൽ പ്രവര്ത്തിച്ചു ശരീരത്തിന്റെ രോഗപ്രതിരോധ ശക്തി ഉത്തേജിപ്പിക്കുന്നു .ചികിത്സാസമയത്തു പനി സമയത്തു കാണുന്നപോലെ പനി , വിറയൽ ,ക്ഷീണം ,മൂത്രസഞ്ചിയിൽ പുകച്ചിൽ ,രക്തസ്രാവം എന്നിവ ഉണ്ടാക്കിയേക്കാം .

‍

Systemic Immunotherapy

Avelumab ( Bavencio)
Nivolumab (Opdivo)
Pembrolizumab(Keytruda)

‍

4.Targeted Therapy

Gene Therapy :ഒരു ക്യാന്സറിന്റെ പ്രത്യേക ജീനുകൾ , പ്രോടീൻ , അല്ലെങ്കിൽ കാൻസർ വളരുന്ന സ്ഥലം എന്നിവയെ ലക്ഷ്യം വെക്കുന്ന ചികിത്സയാണിത് .കാൻസർ കോശങ്ങളുടെ വളർച്ചയും വ്യാപനവും തടയാനും ആരോഗ്യമുള്ള കോശങ്ങളെ സംരക്ഷിക്കാനും ഈ ചികിത്സ സഹായിക്കും . എല്ലാ ക്യാന്സറുകൾക്കും ഒരേ ടാർഗറ്റ് ആയിരിക്കില്ല . അതുകൊണ്ട് രോഗിയിൽ ഏതു ടാർഗറ്റ് ഫലപ്രദമാകും എന്ന് കണ്ടുപിടിക്കാൻ Genomic Tests വേണ്ടി വന്നേക്കും. ഈ ചികിത്സയിൽ സാദാരണ ഉപയോഗിക്കുന്ന മരുന്നുകൾ

Enfortumab vedotin-ejfv(Padcev)
Sacituzumab govitecan (Trodelvy)

‍

5.Radiation Therapy

കീമോതെറാപ്പി നടക്കുന്ന സമയത്തു റേഡിയേഷൻ ചികിത്സ ഒരുമിച്ചു നൽകാറുണ്ട് . കീമോതെറാപ്പി എടുക്കാൻ പറ്റാത്ത ആളുകളിൽ ചിലപ്പോൾ റേഡിയേഷൻ തന്നെ കൊടുക്കാറുണ്ട് .

‍

Bladder Cancer Follow up

കാൻസർ ചികിത്സ പൂർത്തിയായതിനു ശേഷം കൃത്യമായ ഇടവേളകളിൽ ഫോളോ അപ്പ് ടെസ്റ്റുകൾ ചെയ്യേണ്ടതുണ്ട് . പാർശ്വഫലങ്ങൾ കൈകാര്യം ചെയ്യാനും കാൻസർ തിരികെ വരില്ലെന്ന് ഉറപ്പു വരുത്താനും ഫോളോ അപ്പ് ടെസ്റ്റുകൾ നിർബന്ധമാണ് . പതിവ് ശാരീരിക പരിശോധനകൾ , ബ്ലഡ് ടെസ്റ്റ് , ഇമേജിങ് ടെസ്റ്റുകൾ എന്നിവ ഇതിൽ ഉൾപ്പെടുന്നു .

‍

Bladder Cancer (മൂത്രാശയ കാൻസർ)

ഇനിയും വായിക്കുക

ഈ തരത്തിലുള്ള ബ്ലോഗുകൾ

News About This Type

Media About This Type

Decoding Cancer: Staging and Treating Bladder Cancer | ബ്ലാഡർ കാൻസറിന്റെ സ്റ്റേജിംഗും ചികിത്സയും

മൂത്രസഞ്ചിയിലുള്ള ക്യാന്‍സര്‍ | Bladder cancer