ലോക ഹെഡ് ആൻഡ് നെക്ക് കാൻസർ ദിവസം- ജൂലൈ 27.

എന്താണ് ഹെഡ് ആൻഡ് നെക്ക് ക്യാൻസർ?

വായിലും തൊണ്ടയിലും കഴുത്തിലും മൂക്കിലും കണ്ണുകളിലും ചെവിയിലും തലയിലും ഉമിനീർ ഗ്രന്ധികളിലും തൈറോയ്ഡ്/ പാരാ തൈറോയ്ഡ് ഗ്രന്ധികളിലും കാണുന്ന കാൻസറുകളെ ഒന്നിച്ചു പറയുന്ന പേരാണ് ഹെഡ് ആൻഡ് നെക്ക് ക്യാൻസർ. മുഖത്തെ എല്ലുകളിലും പേശികളിലും തൊലിയിലും ഒക്കെ കാണുന്ന ക്യാൻസറുകളെയും ഈ വിഭാഗത്തിൽ പെടുത്താം. ഇതിൽ തന്നെ വായ്ക്കുള്ളിലേയും തൊണ്ടയിലേയും (mucosa) ക്യാൻസറുകളാണ് സാധാരണയായി കാണാറുള്ളത്. ഇതോടൊപ്പം തന്നെ ഇന്നത്തെ കാലത്തു വളരെ സാധാരണയായി കൊണ്ടിരിക്കുന്ന ഒരു അസുഖമാണ് തൈറോയ്ഡ് ഗ്രന്ഥിയിലെ ക്യാൻസർ.

എന്തു കൊണ്ടാണ് ഹെഡ് ആൻഡ് നെക്ക് ക്യാൻസറിനെ കുറിച്ച് വീണ്ടും വീണ്ടും പറയേണ്ടി വരുന്നത് എന്നത് രസകരമായ എന്നാൽ വളരേ അധികം ചിന്തിക്കുകയും പ്രവൃത്തിക്കുകയും ചെയ്യേണ്ടുന്ന ഒരു കാര്യമാണ്. ഇന്ന് ലോകത്തിലെ എഴുപതു ശതമാനത്തോളം ഹെഡ് ആൻഡ് നെക്ക് ക്യാൻസറും ഏഷ്യയിലാണ്. അതിൽ തന്നെ നാൽപതു ശതമാനത്തോളം ഇന്ത്യയും പാകിസ്ഥാനും അഫ്ഗാനിസ്ഥാനും ബംഗ്ലദേശും നേപ്പാളും ഭൂട്ടാനും ശ്രീലങ്കയും ഒക്കെ ഉൾപ്പെടുന്ന ഇന്ത്യൻ ഉപഭൂഖണ്ഡത്തിലും.

ഇന്ത്യയിൽ ഡയഗ്‌നോസ് ചെയ്യപ്പെടുന്ന ക്യാൻസറുകളിൽ മുപ്പതു ശതമാനവും ഹെഡ് ആൻഡ് നെക്ക് ക്യാൻസർ ആണ്. മറ്റു വികസിത രാജ്യങ്ങളിൽ ഇത് മൂന്നോ നാലോ ശതമാനം മാത്രമാണ്. അതായത് ആളുകളുടെ വിദ്യാഭ്യാസത്തിനും ജീവിത നിലവാരത്തിനും അനുസരിച്ചു ഹെഡ് ആൻഡ് നെക്ക് ക്യാൻസർ കുറയുന്നുണ്ട്. ഈ ഡാറ്റകൾ കാണിക്കുന്നത് ഇത്തരം ക്യാൻസറുകൾ തടയാവുന്നതാണ് (Preventable) എ ന്നാണ്. കാരണം ഒട്ടു മിക്ക ക്യാൻസറുകളും പുകയിലയുടെ ഉപയോഗവും മദ്യപാനവും ആയി ബന്ധപ്പെട്ടിരിക്കുന്നു. അത് തന്നെ ആണ് ഹെഡ് ആൻഡ് ക്യാൻസറിനെ കുറിച്ച് ബോധവൽക്കരിക്കേണ്ടതിന്റെ ഏറ്റവും പ്രധാനപ്പെട്ട ആവശ്യം.

മറ്റൊരു കാരണം, എത്രയൊക്കെ ശാസ്ത്രവും ചികിത്സ രീതികളും പുരോഗമിച്ചിട്ടും ഇത്തരം ക്യാൻസറുകളുടെ അഞ്ചു വർഷത്തെ സർവൈവൽ റേറ്റ് ( 5 year survival rate ) അൻപതു ശതമാനമാണ്. ഇതിന്റെ പ്രധാന കാരണം കൂടുതൽ രോഗികളിലും രോഗം ഡയഗ്‌നോസ് ചെയ്യപ്പെടുന്നത് മൂന്നാമത്തെയോ നാലാമത്തെയോ സ്റ്റേജിൽ ആണ് എന്നതാണ്. ഇന്ത്യയിലെ എഴുപതു ശതമാനത്തോളം ഹെഡ് ആൻഡ് നെക്ക് ക്യാൻസറുകളും ഡയഗ്‌നോസ് ചെയ്യപ്പെടുന്നത് മൂന്നാമത്തെയോ നാലാമത്തെയോ സ്റ്റേജിൽ ആണ്. അതിന്റെ പ്രധാന കാരണം, ഈ അസുഖത്തെ കുറിച്ചും അതിന്റെ ലക്ഷണങ്ങളെ കുറിച്ചും ഉള്ള അറിവില്ലായ്മ തന്നെ ആണ്. മാത്രമല്ല ഈ അസുഖം കൂടുതലും പിടിപെടുന്നത് സമൂഹത്തിലെ താഴ്ന്ന സാമൂഹിക സാമ്പത്തിക അവസ്ഥയിൽ ജീവിക്കുന്നവരിലാണ്. അവരുടെ ഇടയിൽ പുകയിലയുടെ ഉപയോഗവും മദ്യപാനവും കൂടുതൽ ആയതു കൊണ്ടും ക്യാൻസറിനെ പ്രതിരോധിക്കേണ്ട രീതിയിൽ ഉള്ള ഭക്ഷണങ്ങളും പോഷകങ്ങളും ആവശ്യത്തിന് കിട്ടാത്തതുമാവാം കാരണങ്ങൾ. അതുകൊണ്ടു തന്നെ അവർക്ക് പെട്ടെന്ന് ആശുപത്രികളിൽ പോയി അസുഖം കണ്ടുപിടിക്കാനുള്ള സാഹചര്യം ഇന്ത്യയിലെ പല സ്ഥലങ്ങളിലും ഇല്ല എന്നതൊരു യാഥാർഥ്യം തന്നെയാണ്. ഈ കാര്യത്തിൽ കേരളം മറ്റു സ്ഥലങ്ങളിൽ നിന്നും വേറിട്ട് നിൽക്കുന്നുണ്ടെങ്കിലും നമ്മുടെ നാട്ടിലും നല്ലൊരു ശതമാനം ഹെഡ് & നെക്ക് ക്യാൻസറുകളും വളർന്നു വലുതായ അവസ്ഥയിൽ ആണ് ആശുപത്രികളിൽ എത്തുന്നത്.

ഇത്തരം ക്യാൻസറുകളുടെ പ്രധാന കാരണങ്ങൾ എന്തൊക്കെയാണെന്ന് നോക്കാം. ഏറ്റവും പ്രധാനപ്പെട്ട കാരണം പുകയില തന്നെ ആണ്. ക്യാൻസർ ഉണ്ടാക്കാൻ കഴിവുള്ള എഴുപതിൽ അധികം രാസപഥാർത്ഥങ്ങൾ പുകയിലയിൽ ഉണ്ടെന്നാണ് ശാസ്ത്രീയപഠനങ്ങൾ തെളിയിക്കുന്നത്. പുകയിലയുടെ ഉപഭോഗം പലരീതിയിൽ കാണാം. ബീഡി, സിഗരറ്റ്, ചുരുട്ട് എന്നിങ്ങനെ വലിക്കുന്ന രീതികളും പാൻ, വെറ്റില അങ്ങനെ പല രീതികളിൽ ചവക്കുന്ന രീതികളിലും കാണാം. Reverse smoking അഥവാ കത്തിച്ച ഭാഗം വായ്ക്കുള്ളിലാക്കി വലിക്കുന്ന സമ്പ്രദായങ്ങളും ഉത്തരേന്ത്യയിൽ പല സ്ഥലത്തും പ്രചാരത്തിൽ ഉണ്ടത്രേ.

മറ്റൊരു പ്രധാന കാരണം മദ്യമാണ്. മദ്യം വയറിലെ അവയവങ്ങളെയോ കരളിനെയോ മാത്രമല്ല, നമ്മുടെ വായിലും തൊണ്ടയിലും അന്നനാളത്തിലും ഒക്കെ കാൻസർ ഉണ്ടാക്കാൻ മുൻപന്തിയിൽ തന്നെ ഉണ്ട്. നമ്മുടെ നാട്ടിലെ വേറൊരു രീതിയാണ് മദ്യപിച്ചതിനു ശേഷം പുകവലിക്കുക എന്നത്. ഇത് ക്യാൻസർ വരാനുള്ള സാധ്യത ഇരട്ടിപ്പിക്കുകയല്ല, മറിച്ചു പല മടങ്ങായി വർദ്ധിപ്പിക്കുകയാണ് ചെയ്യുന്നത്. അതിന്റെ പ്രധാന കാരണം സാധാരണ ഉമിനീരിലോ വെള്ളത്തിലോ അലിയാത്ത കാർസിനോജനുകളെ മദ്യം അലിയിപ്പിച്ചു ശരീരത്തിലേക്കും കോശങ്ങളിലേക്കും വലിച്ചെടുക്കാൻ സഹായിക്കുന്നു. കൂടാതെ അമിത മദ്യപാനം വഴിയോ ശർദ്ധിക്കുന്നത് കൊണ്ടോ ഉണ്ടാകുന്ന ചെറിയ മുറിവുകളും പുണ്ണുകളും (mucosal ulcer & erosions) ഇത്തരം രാസവസ്തുക്കളെ ശരീരത്തിനുള്ളിൽ എത്തിക്കാൻ സഹായിക്കുന്നു. കൂടാതെ അമിത മദ്യപാനം മൂലം, നമ്മുടെ ശരീരത്തിൽ ക്യാൻസർ ഉണ്ടാക്കുന്ന രീതിയിൽ വന്ന ജനിതക വ്യതിയാനങ്ങളെ തിരുത്തി, നോർമൽ ആക്കാൻ സഹായിക്കുന്ന എൻസയ്മുകളെ (enzyme) നിർവീര്യമാക്കുന്നു. അമിത മദ്യപാനം ശരീരത്തിൽ പോഷകാഹാരക്കുറവ് ഉണ്ടാക്കുകയും ക്യാൻസർ പ്രതിരോധിക്കുന്നതിന് അത്യാവശ്യമായ ആന്റി ഓക്സിഡന്റുകളുടെ കുറവ് ഉണ്ടാക്കുകയും ചെയ്യുന്നു.

പുകയിലയും മദ്യവും മാത്രമല്ല, ചിലയിനം വൈറസുകളും ക്യാൻസർ ഉണ്ടാക്കുന്നവയാണ്. HPV (HUMAN PAPILLOMA VIRUS) , EBV (EBSTEINBAR VIRUS) , HIV എന്നിവ ഇവയിൽ പ്രധാനികൾ ആണ്. ഇതിൽ തന്നെ HPV പ്രത്യേകം പരാമർശം അർഹിക്കുന്നു. വികസിത രാജ്യങ്ങളിൽ, തൊണ്ടയിലെ ഒരു ഭാഗമായ OROPHARYNX ഇൽ വരുന്ന ക്യാൻസറുകളുടെ പ്രധാന കാരണം HPV ആണത്രേ. ഇതിനു പ്രധാന കാരണം പല ലൈംഗിക പങ്കാളികൾ ഉണ്ടാവുന്നതും ഓറൽ സെക്സും ആണ്. ഇന്ത്യയിലെ കൃത്യമായ കണക്കുകൾ ലഭ്യമല്ല. പക്ഷേ, HPV കൊണ്ടുള്ള ക്യാൻസറുകൾ പൂർണ്ണമായും ചികിൽസിച്ചു മാറ്റാൻ എളുപ്പമാണ്. മൂക്കിന്റെ പുറകിലായി ഉള്ള NASOPHARYNX എന്ന ഭാഗത്തെ ക്യാൻസറിന്റെ പ്രധാന കാരണം EBV ആണ്. ചൈനയിലാണ് ഇത്തരം ക്യാൻസറുകൾ കൂടുതൽ ആയി കാണപ്പെടുന്നത്.

HIV മാത്രമല്ല, രോഗപ്രതിരോധ ശേഷി കുറക്കുന്ന ഏതൊരു അവസ്ഥയും ഇത്തരം ക്യാൻസറുകൾക്കു കാരണമാണ്. ഉദാഹരണമായി പറയുകയാണെങ്കിൽ പല അസുഖങ്ങളുടെ ഭാഗമായി രോഗ പ്രതിരോധശേഷി കുറക്കാനുള്ള മരുന്ന് കഴിക്കേണ്ടവർ, നിയന്ത്രണമില്ലാത്ത പ്രമേഹം ഒക്കെ ക്യാൻസർ ഉണ്ടാക്കാം. കൂടാതെ പല്ലുകൾ കൊണ്ടോ വെപ്പ് പല്ലുകൾ കൊണ്ടോ ഉണ്ടാകുന്ന സ്ഥിരമായ മുറിവുകളും ചതവുകളും ഒക്കെ വായിലെ ക്യാൻസറിന്റെ കാരണങ്ങൾ ആണ്. അമിതവണ്ണവും വ്യായാമം ഇല്ലാത്ത ജീവിതരീതികളും ശരീരത്തിൽ ഫ്രീ റാഡിക്കൽസിന്റെ അളവുകൾ കൂട്ടുകയും എവിടെ വേണമെങ്കിലും ക്യാൻസറിന് കാരണമായി തീരുകയും ചെയ്യാം. കൂടാതെ പല ഹെവി മെറ്റലുകളും മരപ്പൊടിയും ഒക്കെ ആയി വർഷങ്ങൾ ആയുള്ള സമ്പർക്കവും ശ്വസിക്കുന്നതും പല ക്യാൻസറുകൾക്കും കാരണമാണത്രെ.

ഇത്തരം ക്യാൻസറുകളുടെ ലക്ഷണങ്ങൾ എന്തൊക്കെ ആണെന്ന് നോക്കാം. ഇത്തരം ലക്ഷണങ്ങൾ ഓരോ ശരീരഭാഗത്തിനും അനുസരിച്ചു വ്യത്യാസം വരും.

വായിലെ ക്യാൻസറുകൾ തുടങ്ങുന്നത് ഒരു പുണ്ണായിട്ടാണ്. ഏതൊരു പുണ്ണും മൂന്നോ നാലോ ആഴ്ച്ചയായി, ചികിത്സ എടുത്തിട്ടും മാറുന്നില്ലെങ്കിൽ തീർച്ചയായും ബയോപ്സി എടുക്കണം. ഈ പുണ്ണ് വലുതായി, ആഴത്തിൽ ഇറങ്ങുമ്പോൾ മാത്രമായിരിക്കും ചിലപ്പോൾ വേദന വരുന്നത്. അല്ലെങ്കിൽ ഭക്ഷണത്തിലെ എരിവോ പുളിയോ ഒക്കെ തട്ടുമ്പോൾ ഉണ്ടാവുന്ന നീറ്റലും അസ്വസ്ഥതകളും മാത്രമേ തുടക്കത്തിൽ ഉണ്ടാവണം എന്നുള്ളൂ. അത് നാക്കിൽ ആണെങ്കിൽ സംസാരത്തിനെ ബാധിക്കും, ചില സ്വരങ്ങൾ പറയാൻ കഴിയാതെ വരും. നാക്കിന്റെ സ്വതന്ത്രമായ ഇളക്കത്തിനെ ബാധിക്കുമ്പോൾ ഭക്ഷണം കഴിക്കാൻ ബുദ്ധിമുട്ടുണ്ടാകും. നാക്കിന്റെ പുറകു ഭാഗത്താണെങ്കിൽ തുടക്കം മുതൽ തന്നെ നല്ല വേദന ഉണ്ടാവാൻ സാധ്യത ഉണ്ട്. താടി എല്ലിലെ ക്യാൻസർ ആണെങ്കിൽ തുടക്കത്തിൽ പല്ലുകൾ ലൂസ് ആവുന്നതും പറിഞ്ഞു വരുന്നതും, പല്ലുകൾക്കിടയിൽ നിന്നും രക്തം വരുന്നതും ഒക്കെ തുടക്കത്തിലുള്ള ലക്ഷണങ്ങൾ ആവാം. വെപ്പ് പല്ല് ഉപയോഗിക്കുന്നവർ ആണെങ്കിൽ അതുപയോഗിക്കാൻ പറ്റാതാവുക (Ill fitting dentures) ഒരു ലക്ഷണമാണ്. പുണ്ണുകൾ വലുതായി ഒരു വളർച്ച ആയും കാണാം. വായ്ക്കകത്തുള്ള ഉമിനീർ ഗ്രന്ധികളിൽ ഉണ്ടാകുന്ന ക്യാൻസറുകൾ സാധാരണ, വളരെ പതിയെ വളരുന്ന മുഴകൾ ആയാണ് സാധാരണ കാണാറുള്ളത്.

തൊണ്ട എന്ന് നമ്മൾ പറയുമ്പോൾ അതിൽ Nasopahrynx, Oropharynx, Hypopharynx, Larynx എന്നിങ്ങനെ നാലു ഭാഗങ്ങൾ ഉണ്ട്. ഇതിൽ Nasopharynx എന്നാൽ മൂക്കിന് പുറകു വശത്തുള്ള, ഭക്ഷണം ഇറക്കുന്നതിന് മുകളിലുള്ള ഭാഗം ആണ്. ഇവിടെ വരുന്ന ക്യാൻസറുകൾ മൂക്കടപ്പായും, രക്തം കലർന്ന സ്രവങ്ങൾ ആയും, കൂർക്കം വലി ആയും, ചെവിയേയും മൂക്കിനേയും കണക്ട് ചെയ്യുന്ന ട്യൂബിനെ ബാധിച്ചു കേൾവിക്കുറവ്, ചെവിയിൽ വേദന, പഴുപ്പ്... തുടങ്ങിയ രീതികളിൽ ലക്ഷണങ്ങൾ കാണിച്ചേക്കാം.Oropharynx, Hypopharynx എന്നിവ ഭക്ഷണം പോവുന്ന സ്ഥലങ്ങൾ ആയതിനാൽ വിഴുങ്ങാനുള്ള ബുദ്ധിമുട്ടുകൾ ആയി അനുഭവപ്പെട്ടേക്കാം. എന്നാൽ ഭക്ഷണം ചെല്ലുമ്പോൾ വികസിക്കുന്ന ഇടങ്ങൾ ആയതിനാൽ ഭക്ഷണം കഴിക്കുന്നതിന് തടസം വരുന്നത് വളരെ വലുതായതിന് ശേഷം മാത്രമായിരിക്കും. തുടക്കത്തിൽ പലപ്പോഴും തൊണ്ടയിൽ എന്തോ ഇരിക്കുന്ന ഒരു തോന്നൽ മാത്രമായാണ് അനുഭവപ്പെടുക. ഈ പറഞ്ഞ ക്യാൻസറുകൾ എല്ലാം തന്നെ പലപ്പോഴും കഴുത്തിലെ കഴലകൾ വലുതായ നിലയിലും കണ്ടു പിടിക്കപ്പെടാറുണ്ട്. മറ്റു ലക്ഷണങ്ങൾ വരുന്നതിനും മുൻപേ രോഗി ശ്രദ്ധിക്കുന്നത് ഇത്തരം കഴലകളെ ആവാം.

Larynx അഥവാ സ്വനപേടകത്തിലെ കാൻസറുകൾ സാധാരണ തുടക്കത്തിൽ തന്നെ ശബ്ദവ്യത്യാസം ഉണ്ടാക്കും. അതുകൊണ്ടു തന്നെ പലപ്പോഴും ഒന്നാമത്തെ സ്റ്റേജിൽ തന്നെ കണ്ടു പിടിക്കപ്പെടാറുണ്ട്. എന്നാൽ supraglottis എന്ന ഭാഗത്തൊക്കെ വരുമ്പോൾ തുടക്കത്തിൽ തന്നെ ശബ്ദവ്യത്യാസം ഉണ്ടാവണം എന്നില്ല. ഒരു foreign body sensation മാത്രമേ തുടക്കത്തിൽ ഉണ്ടാവണം എന്നുള്ളൂ. സ്വനപേടകത്തിലെ ഏതൊരു ക്യാൻസറും ശ്വാസതടസം, ചുമ എന്നീ ലക്ഷണങ്ങൾ കാണിക്കാം. ഇത്തരം ക്യാൻസറുകളും കഴുത്തിലെ കഴലകൾ ആയി ഡയഗ്‌നോസ് ചെയ്യപ്പെടുന്നത് കുറവല്ല.

ഉമിനീർ ഗ്രന്ധികളിലെ ക്യാൻസർ സാധാരണയായി ഈ ഗ്രന്ധികളിലെ മുഴകൾ ആയാണ് വരാറുള്ളത്. വേദനകൾ ഇല്ലാത്ത ഇത്തരം മുഴകൾ പെട്ടെന്നു തന്നെ വളർച്ച കാണിക്കുകയാണെങ്കിൽ എത്രയും പെട്ടെന്ന് ഡോക്ടറെ കാണുകയും കുത്തി എടുത്തു പരിശോധിക്കുകയും ചെയ്യണം.
അതുപോലെ തന്നെ തൈറോയ്ഡ് ഗ്രന്ഥിയിലെ ക്യാൻസറുകളും മുഴകളായോ കഴുത്തിലെ കഴലകൾ ആയോ ആണ് പ്രത്യക്ഷപ്പെടാറുള്ളത്.

പലപ്പോഴും വായിൽ ഉണ്ടാകുന്ന ക്യാൻസറുകൾ പ്രീ മാലിഗ്നന്റ് ലെഷൻസ് അഥവാ ക്യാൻസറിന് മുൻപുള്ള തൊലിയിൽ ഉണ്ടാകുന്ന വ്യത്യാസങ്ങൾ ആയി കാണാറുണ്ട്. ഇത്തരം വ്യത്യാസങ്ങൾ വെളുത്ത പാടുകൾ (Leukoplakia), ചുവന്നു തടിച്ച പാടുകൾ (Erythroplakia), Submucous fibrosis (വായിലെ തൊലി വരണ്ടു പ്ലാസ്റ്റിക് പോലെ ആവുന്ന അവസ്ഥ), lichen planus (നീല നിറത്തിലോ വയലറ്റ് നിറത്തിലോ ഉള്ള പാടുകൾ ) ആയി വരാം. ഇത്തരം വ്യത്യാസങ്ങൾ കണ്ടാൽ ഡോക്ടറെ കാണുകയും ബയോപ്സി ആവശ്യമെങ്കിൽ എടുക്കുകയും വേണം. ക്യാൻസർ ലക്ഷണങ്ങൾ കാണുന്നില്ലെങ്കിൽ അതിനു കാരണക്കാരായ പുകയിലയുടെ ഉപയോഗം അല്ലെങ്കിൽ മദ്യപാനം ഉടൻ നിർത്തണം, തുടർന്ന് കൃത്യമായ ഇടവേളകളിൽ ഡോക്ടറെ കാണിച്ചു കൊണ്ടിരിക്കണം.

ഇത്തരം ലക്ഷണങ്ങൾ കണ്ടാൽ ക്യാൻസർ ആണെന്നുറപ്പിക്കാൻ ചെയ്യേണ്ടുന്ന ടെസ്റ്റ് ബയോപ്സി ആണ്. വായിലേയും തൊണ്ടയിലേയും മുറിവുകളും വളർച്ചകളും ഒക്കെ ബയോപ്സി ചെയ്തു ക്യാൻസർ ആണോ അല്ലയോ എന്ന് ഉറപ്പു വരുത്തണം. കഴുത്തിലെ കഴലകളോ മുഴകളോ ആണെങ്കിൽ കുത്തിയെടുത്തു പരിശോധിക്കുക അഥവാ FNAC എന്ന ടെസ്റ്റ് ആണ് ചെയ്യേണ്ടത്.

ചിലർക്കെങ്കിലും ബയോപ്സി എന്ന് കേൾക്കുന്നത് തന്നെ പേടിയാണ്. അങ്ങനെ പേടിച്ചു പേടിച്ചു ബയോപ്സി എടുക്കാതെ ഒന്നാമത്തെ സ്റ്റേജിൽ ഉള്ള അസുഖത്തെ നാലാമത്തെ സ്റ്റേജിൽ ആക്കുന്നവരും ഉണ്ട്. ക്യാൻസറിന്റെ കാര്യത്തിൽ സമയം വളരെ പ്രധാനമാണ്.

ക്യാൻസർ ഡയഗ്‌നോസ് ചെയ്തു കഴിഞ്ഞാൽ സ്റ്റേജ് അറിയണമെങ്കിൽ സ്കാൻ ചെയ്തു നോക്കണം. അത് രോഗത്തിന്റെ അവസ്ഥക്കും ബാധിച്ച ഭാഗത്തിനും അനുസരിച്ചു ചിലപ്പോൾ സി ടി സ്കാൻ ആവാം, എം ആർ ഐ ആവാം, അൾട്രാ സൗണ്ട് സ്കാൻ ആവാം. തൊണ്ടയിലോ മൂക്കിലോ ബാധിച്ച അസുഖങ്ങൾക്ക് എൻഡോസ്കോപ്പിയും ചെയ്യേണ്ടി വന്നേക്കാം.

വായിലും മൂക്കിലും മേൽത്താടി എല്ലിനെയും ഒക്കെ ബാധിക്കുന്ന അസുഖങ്ങൾക്ക് സാധാരണയായി സർജറി ആണ് ആദ്യം ചെയ്യേണ്ടത്. ഒന്നാമത്തെയോ രണ്ടാമത്തെയോ സ്റ്റേജ് ആണെങ്കിൽ സാധാരണ സർജറി മാത്രം മതിയാകും. സ്റ്റേജ് കൂടുന്നതിനനുസരിച്ചു, സർജറിക്ക്‌ ശേഷം നടത്തുന്ന പാത്തോളജി പരിശോധന ഫലത്തിനനുസരിച്ചു റേഡിയേഷൻ, കീമോതെറാപ്പി എന്നീ ചികിസകൾ വേണ്ടി വന്നേക്കാം. തൊണ്ടയിലെ ക്യാൻസറിന് ആദ്യ സ്റ്റേജുകളിൽ റേഡിയേഷൻ മാത്രം അല്ലെങ്കിൽ ലേസർ സർജറി ചെയ്യാൻ പറ്റുന്ന സ്ഥലമാണെങ്കിൽ സർജറി മാത്രം എന്നതാണ് ചികിത്സ. സ്റ്റേജ് കൂടുന്നതിനനുസരിച്ചു കീമോ റേഡിയേഷൻ, സർജറി + റേഡിയേഷൻ/ കീമൊറേഡിയേഷൻ എന്നീ ചികിത്സകൾ വേണ്ടി വന്നേക്കാം. വളരെ വൈകി നാലാമത്തെ സ്റ്റേജിൽ തന്നെ, ഓപ്പറേഷനോ റേഡിയേഷനോ ചെയ്യാൻ പറ്റാത്ത അവസ്ഥയിൽ വരുന്ന അസുഖങ്ങൾക്ക് ചിലപ്പോൾ ആദ്യം കീമോതെറാപ്പി കൊടുത്തു, അസുഖത്തെ ചുരുക്കിയതിനു ശേഷം തുടർ ചികിസകൾ നൽകേണ്ടി വന്നേക്കാം.

ഉമിനീർ ഗ്രന്ഥികളിലെ ക്യാൻസറിനും തൈറോയ്ഡ് ക്യാൻസറുകളുടെയും പ്രധാന ചികിത്സ ഓപ്പറേഷൻ തന്നെ ആണ്. ഉമിനീർ ഗ്രന്ഥികളിൽ വരുന്ന ചില ക്യാൻസറുകൾക്ക് ഓപ്പറേഷന് ശേഷം റേഡിയേഷൻ വേണ്ടി വന്നേക്കാം. തൈറോയ്ഡ് ഗ്രന്ഥിയിലെ ക്യാൻസറുകൾ പ്രധാനമായും നാലു തരം ഉണ്ട്. അതിൽ Differentiated thyroid ക്യാൻസർ എന്ന വിഭാഗത്തിൽ പെടുന്ന പാപില്ലറി (Papillary), ഫോളിക്കുലാർ (Follicular) എന്നീ ക്യാൻസറുകൾ സാധാരണ വലിയ ഉപദ്രവം ഒന്നും ചെയ്യാറില്ല. എന്നാലും ചിലപ്പോൾ ശ്വാസകോശത്തിനേയോ എല്ലുകളേയോ ബാധിച്ച അവസ്ഥയിൽ വരാറുണ്ട്. എന്നാലും റേഡിയോ അയോഡിൻ ചികിത്സ കൊണ്ട് അതെല്ലാം നശിപ്പിച്ചു കളയാവുന്നതേയുള്ളൂ. ഇത്തരം ക്യാൻസറുകൾക്കു അപൂർവ്വമായേ റേഡിയേഷൻ കൊടുക്കേണ്ടുന്ന അവസ്ഥ വരാറുള്ളൂ. ഇത്തരം ക്യാൻസറുകൾ നിരുപദ്രവകാരികൾ ആണെങ്കിലും അവക്ക് അർഹിക്കുന്ന ബഹുമാനം കൊടുത്ത് സമയാസമയത്തു ചികിൽസിക്കുകയാണെങ്കിൽ സാധാരണ പ്രശ്നങ്ങൾ ഒന്നും ഉണ്ടാകാറില്ല. പിന്നീട് ആറു മാസം കൂടുമ്പോൾ തൈറോഗ്ലോബുലിൻ എന്ന രക്തപരിശോധനയും ഡോക്ടർ നിർദ്ദേശിക്കുന്ന അളവിൽ തൈറോയ്ഡ് ഗുളികയും കഴിച്ചാൽ മതി.

തൈറോയ്ഡ് ഗ്രന്ഥിയിൽ ഉണ്ടാവുന്ന വേറൊരു ക്യാൻസർ ആണ് മെഡുല്ലറി ക്യാൻസർ. ഇത്തരം ക്യാൻസറുകളുടെയും പ്രധാന ചികിത്സ സർജറി തന്നെയാണ് . അതിന്റെ സ്റ്റേജിനും കഴലകളെ ബാധിച്ചതും കാൽസിടോണിൻ എന്ന രക്ത പരിശോധനക്കും അനുസരിച്ചു ചിലർക്ക് റേഡിയേഷൻ വേണ്ടി വരാറുണ്ട്.

നമ്മുടെ ശരീരത്തിൽ ഏറ്റവും പാവപ്പെട്ട ക്യാൻസർ വരുന്നത് തൈറോയ്ഡ് ഗ്രന്ഥിയിൽ ആണെന്ന് പറഞ്ഞല്ലോ. എന്നാൽ ഏറ്റവും വീര്യമേറിയ ക്യാൻസർ വരുന്നതും തൊണ്ടയിലെ ഈ ചിത്രശലഭത്തിന്റെ ആകൃതിയിൽ ഉള്ള ഗ്രന്ഥിയിൽ തന്നെയാണ്. അതാണ് അനാപ്ലാസ്റ്റിക് ക്യാൻസർ. സാധാരണ പ്രായം കൂടിയവരിൽ ആണ് ഇത് കാണുന്നത്. ഡയഗ്‌നോസ് ചെയ്താൽ പിന്നെ പാലിയേറ്റിവ് ചികിത്സ അല്ലാതെ വേറെ ഒന്നും ഇല്ല. ഡയഗ്‌നോസ് ചെയ്തതിന് ശേഷം അധികകാലം ജീവിച്ചിരിക്കുന്നതും കുറവാണ്. എന്നിരുന്നാലും ആധുനികമായ ചില ഇമ്മ്യൂണോതെറാപ്പികൾ ഇത്തരം ക്യാൻസറുകൾക്ക് ഫലപ്രദമാണെന്ന് പഠനങ്ങൾ തെളിയിച്ചിട്ടുണ്ട്.

ക്യാൻസർ ഇന്നും എല്ലാവരേയും പേടിപ്പെടുത്തുന്ന ഒരു അസുഖം തന്നെ ആണ്. എന്നാൽ ഇന്ന് കാണുന്ന ഒട്ടു മിക്ക ക്യാൻസറുകളും നമുക്ക് ചികിസിച്ചു മാറ്റാവുന്നതേയുള്ളൂ. അതിനാദ്യം ചെയ്യേണ്ടത് ക്യാൻസറിനെയും ക്യാൻസർ ചികിത്സയേയും പേടിക്കാതിരിക്കുക എന്നതാണ്. ആ ഡയഗ്നോസിസ് അംഗീകരിക്കാനുമുള്ള വിഷമവും മടിയും പലപ്പോഴും ചികിത്സ വൈകിപ്പിക്കുകയും ഉയർന്ന സ്റ്റേജിലേക്ക് അസുഖത്തെ കൊണ്ടെത്തിക്കുകയും ചെയ്യും.

ക്യാൻസർ ഡയഗ്‌നോസ് ചെയ്യപ്പെട്ടാൽ ആദ്യം ചെയ്യേണ്ടത് ചികിൽസിക്കുന്ന ഡോക്ടറേയും ആശുപത്രിയും തീരുമാനിക്കുക എന്നതാണ്.
മെഡിക്കൽ ഷോപ്പിംഗ് അഥവാ ഒപ്പീനിയന് വേണ്ടി ആശുപത്രികൾ കയറി ഇറങ്ങുന്നത് ഒഴിവാക്കുക. അന്ത്രരാഷ്ട്ര നിലവാരത്തിൽ ഉള്ള മാർഗനിർദ്ദേശങ്ങൾക്കനുസരിച്ചാണ് മിക്ക ആശുപത്രികളിലും ചികിത്സ നടക്കുന്നത്. നിങ്ങളുടെ സൗകര്യവും, സാമ്പത്തിക സ്ഥിതിയും, എത്തിപ്പെടാനും താമസിക്കാനും ഉള്ള സൗകര്യങ്ങൾ നോക്കി എത്രയും പെട്ടെന്നു തന്നെ ആശുപത്രി തീരുമാനിക്കുക, ചികിത്സ തുടങ്ങുക. നഷ്ടപ്പെടുത്തുന്ന സമയത്തിന് ജീവന്റെ വിലയുണ്ട്. അഭിപ്രായങ്ങൾ പറയാനും കുറ്റങ്ങൾ ചൂണ്ടിക്കാട്ടി അവിടെ പോ ... അങ്ങോട്ട് പോണ്ട എന്നൊക്കെ പറയാൻ ഒരു പാട് ആളുകൾ ഉണ്ടാവും. പലതും കേട്ട് കേൾവി മാത്രമാവും. അനുഭവിക്കാൻ നിങ്ങളേ കാണൂ.

ഇത് നിങ്ങളുടെ ജീവിതമാണ്, വിലയേറിയ സമയം നഷ്ടപെടുത്താതിരിക്കുക.

Dr Santhosh Kumar N