കൊലയാളിയായി ശ്വാസകോശാർബുദം

ഇന്ന് കാണുന്ന മാരകമെന്നോ ആപൽക്കരമെന്നോ കരുതാവുന്ന ക്യാൻസറുകളിൽ ഏറ്റവും ദോഷകരമായ കൊലയാളിയായി ശ്വാസകോശാർബുദം (Lung Cancer) മാറിയിട്ടുണ്ട്. ആരോഗ്യ വിദഗ്ധരുടെ അഭിപ്രായത്തിൽ കേരളത്തിൽ പ്രസ്തുത രോഗം മൂലം കഷ്ടപ്പെടുന്നവരുടെ എണ്ണം അനിയന്ത്രിതമായി വർദ്ധിച്ചിട്ടുണ്ട്. മുൻകാലങ്ങളിൽ വിരളമായി മാത്രം കണ്ടുവന്നിരുന്ന ശ്വാസകോശാർബുദം ഇന്ന് ഏറെ വ്യാപകമായിട്ടുണ്ട്. പഠനങ്ങൾ സൂചിപ്പിക്കുന്നത് പ്രകാരം സ്തനാർബുദം (Breast Cancer), വൻകുടൽ ക്യാൻസർ (Colon Cancer), പ്രോസ്റ്റേറ്റ് ക്യാൻസർ (Prostate Cancer) എന്നിവയിൽ ഏതെങ്കിലും ബാധിച്ച് മരിക്കുന്നവരുടെ എണ്ണത്തേക്കാൾ അധികം പേർ ശ്വാസകോശാർബുദം എന്ന ഒറ്റ അസുഖം മൂലം മരണം വരിക്കുന്നു എന്നുള്ളത് ആശങ്കാജനകമായ യാഥാർത്ഥ്യമായി തീർന്നിരിക്കുന്നു.

ആലപ്പുഴ ടി. ഡി മെഡിക്കൽ കോളേജിലെ ശ്വാസകോശ വിഭാഗം പ്രൊഫസറും, പൾമണറി - ക്രിട്ടിക്കൽ കെയർ അക്കാദമി തലവനുമായ ഡോ. പി. എസ് ഷാജഹാന്റെ അഭിപ്രായത്തിൽ അദ്ദേഹം മെഡിക്കൽ വിദ്യാർഥിയായിരുന്ന കാലത്ത് വിരളമായി മാത്രം കണ്ടുവന്നിരുന്ന മേൽപ്പറഞ്ഞ അസുഖം ഓരോ ആഴ്ചയിലും മൂന്നു മുതൽ അഞ്ചുവരെ കേസുകൾ റിപ്പോർട്ട് ചെയ്യുന്ന വ്യാപകമായ ഒന്നായി മാറി എന്നുള്ളതാണ്.
മുൻകാലങ്ങളിൽ പ്രായമായവരെയും, പുകവലിക്കാരെയും ബാധിച്ചിരുന്ന ശ്വാസകോശാർബുദം ഇന്ന് യുവാക്കളെയും, സ്ത്രീകളെയും, എന്തിനേറെ കുട്ടികളെ പോലും ബാധിക്കുന്ന അസുഖമായി പരിണമിച്ചിരിക്കുന്നു.
"പുകവലിയാണ് മുഖ്യ രോഗകാരണമെങ്കിലും, വർദ്ധിച്ചുവരുന്ന വായു മലിനീകരണവും വിശിഷ്യാ വാഹനങ്ങളുടെയും, തൊഴിലിടങ്ങളിലെയും മലിനീകൃതമായ വായു സമ്പർക്കവും, വികിരണങ്ങളും, മറ്റ് കാരണങ്ങളും ഇതിന് പുറകിലുണ്ട്."
ഡോ. ഷാജഹാൻ കൂട്ടിച്ചേർക്കുന്നു.

"മറ്റ് അവയവങ്ങളെ ബാധിക്കുന്ന അർബുദങ്ങളുടെ നേരത്തെയുള്ള രോഗനിർണയത്തിൽ ഏറെ പുരോഗതി കൈവരിച്ചുവെങ്കിലും ശ്വാസകോശാർബുദങ്ങളുടെ കാര്യത്തിൽ സ്ഥിതി ആശാസ്യമല്ല."
"ശ്വാസകോശ അർബുദങ്ങളുടെ സിംഹഭാഗവും വളരെ വൈകിയാണ് കണ്ടുപിടിക്കപ്പെടുന്നത് എന്നത് വലിയ വെല്ലുവിളിയും, മരണ നിരക്ക് വർദ്ധിപ്പിക്കുന്ന ഘടകവുമാണ്."
കോലഞ്ചേരി മലങ്കര ഓർത്തഡോക്സ് സിറിയൻ ചർച്ച് മെഡിക്കൽ കോളേജിലെ മെഡിക്കൽ ഓൺകോളജിസ്റ്റ് ഡോ. അജു മാത്യു പറയുന്നു.
ചുമ പോലെയുള്ള പ്രാഥമിക രോഗലക്ഷണങ്ങൾ ഗൗരവത്തിലെടുക്കാതെ ദീർഘകാലം കൊണ്ട് നടക്കുന്നത് മൂലം രോഗനിർണയ വേളയിൽ അസുഖം മറ്റ് അവയവങ്ങളിലേക്ക് വ്യാപിച്ച് പഴകുകയും രോഗമുക്തി പ്രയാസകരമായ അവസ്ഥ സംജാതമാവുകയുമാണ് ചെയ്യുന്നതെന്നും
ഡോ. അജു മാത്യു പറയുന്നു.
ചികിത്സാ 'സമ്പ്രദായങ്ങളിൽ' (Techniques) കാര്യമായ മുന്നേറ്റം കൈവരിച്ചുവെങ്കിലും ചികിത്സ ഇന്നും ഒരു വെല്ലുവിളിയായി തുടരുന്നതും, ചികിത്സയുടെ ചിലവ് വർദ്ധിച്ചുവെന്നതും ശുഭോദർക്കമല്ല.

ക്യാൻസർ ഡാറ്റാ ബേസ് സർവേയുടെ അടിസ്ഥാനത്തിൽ സ്റ്റേജ് 1-ൽ രോഗം കണ്ടുപിടിക്കുന്നത് 26% പേർക്ക് മാത്രമാണെങ്കിൽ സ്റ്റേജ്-2, സ്റ്റേജ്-3, എന്നിവയിൽ അത് യഥാക്രമം 8.3 %, 27.6% വും, സ്റ്റേജ്-4 എന്ന അവസാന ഘട്ടത്തിൽ 38.1 ശതമാനവുമാണ് എന്നത് ഇതിൻറെ അപായ സാധ്യത വെളിവാക്കുന്നു.
പുകയില ഉൽപ്പന്നങ്ങളുടെ ഉപയോഗത്തിൽ സംഭവിച്ച കുറവ് രോഗ നിയന്ത്രണത്തിന് ആശാവഹമായ ഒന്നാണ്.

ക്യാൻസർ അടക്കമുള്ള പകർച്ചവ്യാധികളല്ലാത്ത എല്ലാ അസുഖങ്ങളുടെയും തോത് വർദ്ധിച്ചതിന് പുറകിൽ പുകയിലയുടെയും മദ്യത്തിന്റെയും ഉപയോഗവും, ശാരീരിക അധ്വാനങ്ങളിൽ പൊതുസമൂഹം അവലംബിക്കുന്ന വിമുഖതയുമാണ്. പുകവലി ശ്വാസകോശ അർബുദത്തിനുള്ള പ്രധാനപ്പെട്ട ഒരു കാരണമാണ്. പുകയിലയുടെ ഉപയോഗത്തിൽ വന്ന കുറവിന് അനുഗുണമായി ക്യാൻസറിന്റെ തോതിൽ വരുന്ന മാറ്റം ദൃശ്യമാകുവാൻ കുറച്ചുകാലം എടുക്കുമെന്നും ഹെൽത്ത് എക്കണോമിസ്റ്റ് ആയ റിജോ. എം. ജോൺ പറയുന്നു.

Translation courtesy Biju Krishnankutty

‍