കാൻസറിനെ തോൽപ്പിച്ച ചിരി

ഞാൻ ഓപ്പറേഷൻ ചെയ്ത ഒരു സ്ത്രീ ഉണ്ട്.

നാവിൽ കാൻസർ ആയിരുന്നു.

“രോഗി” എന്ന് ഞാൻ വിളിക്കുന്നില്ല; കാരണം ഇപ്പോൾ അവർ കാൻസർ രോഗിയല്ല. ഓപ്പറേഷൻ കഴിഞ്ഞിട്ട് കൊല്ലം രണ്ടു കഴിഞ്ഞു.

അവരെ നമുക്ക് “രത്നവല്ലി” എന്ന് വിളിക്കാം. അവരും ഒരു സ്ത്രീ രത്നമാണ്.

മുപ്പത്തിരണ്ടാമത്തെ വയസ്സിൽ ഭർത്താവിനെ നഷ്ടപ്പെട്ടു. രണ്ടു ചെറിയ കുട്ടികളും കോർപറേഷൻ വകുപ്പിലെ തൂപ്പ് ജോലിയും മിച്ചം വെച്ച് ജീവിതത്തിനോട് യുദ്ധം ചെയ്യാൻ തുടങ്ങി.

അൻപത്തി ആറാമത്തെ വയസ്സിലാണ് നാവിൽ കാൻസർ വരുന്നത്. “കാൻസർ” എന്ന പേരിലൊന്നും ഒരു തരിമ്പും പേടിച്ചിട്ടില്ല, ഞെട്ടിയിട്ടില്ല.

“അയിനല്ലേ സാറിന്റടുത്തു വന്നത്” എന്ന് ചിരിച്ചു കൊണ്ട് പറയും.

കൂടെയുള്ളത് മോനാണ്. ബാംഗ്ലൂരിൽ ഒരു ഐ ടി കമ്പനിയിൽ ജോലി ചെയ്യുന്ന എൻജിനീയർ. രണ്ടാമത്തെ മോൻ ബാഴ്‌സലോണയിൽ ആണ്. തിരുവനന്തപുരം ഐസറിൽ നിന്നും കോഴ്സ് കഴിഞ്ഞു, സ്പെയിനിൽ പി എച് ഡി ചെയ്യുന്നു.

ഇതിന്റെ എല്ലാം വർക്കിങ് ക്യാപിറ്റൽ കോർപ്പറേഷനിലെ ജോലിയും, “കട്ട” ദൃഢ നിശ്ചയവും പുള്ളേരുടെ കഴിവും തന്നെ.

ഇത്രയും കൂൾ ആയി സർജറിയും അതിനു ശേഷമുള്ള ട്യൂബ് ഫീഡിങ്ങ്, മുറിവുണങ്ങാനുള്ള സമയം ഒക്കെ നേരിട്ട “വ്യക്തികൾ” കുറവാണെന്ന് തന്നെ പറയാം.

പാത്തോളജി റിപ്പോർട്ടിലും ഒന്നാമത്തെ സ്റ്റേജ് തന്നെ.

ഓപ്പറേഷൻ കഴിഞ്ഞു ഒരു മാസം കഴിഞ്ഞുള്ള ഫോളോ അപ്പ് ദിവസം.

“നാളെ മുതൽ ഞാൻ ജോലിക്ക് പോട്ടേ ഡോക്ടർ”

ഞാൻ ഓക്കേ പറയുമ്പോൾ, എൻജിനീയർ ആയ മകൻ ഒന്ന് ചിരിച്ചു കൊണ്ട് പറഞ്ഞു.

“അമ്മക്ക് വെറുതെ ഇരിക്കാൻ പറ്റില്ല ഡോക്ടറേ. ഇത്ര ദിവസം എങ്ങനെയാ വീട്ടിലിരുന്നത് എന്നത് പറയാൻ പറ്റില്ല. ഇനി ജോലിക്കൊന്നും പോണ്ട എന്ന് പറഞ്ഞാലൊന്നും കേൾക്കില്ല.”

ഇത് കേട്ട് നമ്മുടെ രത്നം “ അതേയ് ഡോക്ടറേ, പത്തു മുപ്പതു കൊല്ലം ആയി ഞാനീ പണി എടുക്കാൻ തുടങ്ങീട്ട്. ഇന്റെ തൊണക്കാരൊക്കെ അവിടെ ആണ്. അവരോടു ഒന്നും രണ്ടും പറഞ്ഞു ആ ചൂലും എടുത്തു പണി എടുക്കുന്നതാണ് ഇന്റെ സന്തോഷം.

ഇവരൊക്കെ നാളെ പോവും. ഡോക്ടർ പറഞ്ഞാൽ ജോലിക്കു പോവാം എന്നാണ് ഇവർ പറയുന്നത്.

ഡോക്ടർ പൊയ്ക്കോളാൻ പറയും എന്നെനിക്കറിയാം. ഇക്കിപ്പോ ഒരു കൊഴപ്പോം ല്ല ഡോക്ടറേ.”

ആ ചിരിയിലും ആത്മവിശ്വാസത്തിലും ഞാൻ വീണു.

ഇന്നലേയും അവർ വന്നിരുന്നു. മൂത്ത മകന്റെ കല്യാണക്കുറിയും കയ്യിലുണ്ട്.

“ഡോക്ടറു വരണം ട്ടോ.

ഡോക്ടറ് ഇന്റെ അസുഖം മാറ്റി. എന്നെ എനിക്കിഷ്ടമുള്ള ജോലിക്ക് വീണ്ടും പോവാൻ സമ്മതിച്ചു. ഡോക്ടർ പറഞ്ഞത് കൊണ്ട് മാത്രാണ് ഇന്റെ കുട്ട്യോള് അതിന് സമ്മതിച്ചത്.”

അത് കഴിഞ്ഞു അവരൊരു ചിരി ചിരിച്ചു.

ഈ ലോകത്തെ എല്ലാ പോസിറ്റീവ് എനർജിയും എനിക്ക് മേൽ വർഷിക്കുമാറൊരു ”കട്ട പോസിറ്റിവ്‌” ചിരി.

ജീവിതം “contented” ആവാൻ ഇതൊക്കെ പോരേ.

എന്റെ വലിയ സമ്പാദ്യങ്ങൾ ഈ ചിരികളാണ്, മനസ്സ് തുറന്ന പുഞ്ചിരികളാണ്.

Dr Santhosh Kumar N

‍