ഡോക്ടർ ജീവിതത്തിന്റെ യാഥാർത്ഥ്യം

ഇപ്രാശ്യത്തെ "നീറ്റ്" എൻട്രൻസ് ഫലങ്ങളും തുടർന്നുണ്ടായിക്കൊണ്ടിരിക്കുന്ന കോലാഹലങ്ങളും എല്ലാവരും കണ്ടു കാണും.

ഈ കോലാഹലങ്ങൾ കണ്ടപ്പോഴാണ് ഒരു സത്യം മനസിലായത്. ഏകദേശം ഇരുപത്തി നാല് ലക്ഷത്തോളം വിദ്യാർത്ഥികൾ ഈ പരീക്ഷ എഴുതിയിട്ടുണ്ടത്രേ. അതായത് എം ബി ബി എസ് പഠിച്ചു ഡോക്ടർ ആവാൻ ആഗ്രഹിക്കുന്നവരുടെ എണ്ണമാണിത്.

ഒരു കാര്യം എനിക്കുറപ്പാണ്. ഇതിൽ പകുതിപ്പേരെങ്കിലും സ്വന്തം ഇഷ്ടം കൊണ്ടോ ഡോക്ടർ ആവണം എന്ന തീവ്രമായ ആഗ്രഹം കൊണ്ടോ ഒന്നും എൻട്രൻസ് എഴുതിയവർ ആവണം എന്നില്ല. രക്ഷിതാക്കളുടെ നിർബന്ധം കൊണ്ടും, പ്ലസ് ടു കഴിഞ്ഞു എന്ത് ചെയ്യണം എന്ന് വലിയ ഐഡിയ ഒന്നും ഇല്ല, എല്ലാവരും എൻട്രൻസ് എഴുതുന്നു, അത് കൊണ്ട് ഞാനും എഴുതുന്നു എന്ന് കരുതുന്നവരും, പ്ലസ് 2 വിനു അത്യാവശ്യം മാർക്ക് ഒക്കെ ഉണ്ട് ഒരു വഴിക്കു പോണതല്ലേ എന്നാൽ എൻട്രൻസും എഴുതിയേക്കാം ... അങ്ങനെ പല കാരണങ്ങൾ കൊണ്ട് എൻട്രൻസ് എഴുതുന്നവരുടെ എണ്ണം ഗണ്യമായി കൂടുന്നുണ്ട്.

മെഡിക്കൽ എൻട്രൻസ് എഴുതാൻ താല്പര്യപ്പെടുന്ന കുട്ടികളും മക്കളെ ഡോക്ടർമാർ ആക്കാൻ കച്ച കെട്ടി ഇറങ്ങിയിരിക്കുന്ന രക്ഷിതാക്കളും തീർച്ചയായും മനസിലാക്കേണ്ടി ഇരിക്കുന്ന കുറച്ചു കാര്യങ്ങളാണ് ഞാൻ ഇവിടെ പറയാൻ പോവുന്നത്. ഇതാരെയും നിരുത്സാഹപ്പെടുത്താൻ അല്ല, ഗുണങ്ങളും ദോഷങ്ങളും കണ്ടറിഞ്ഞു മാത്രം നിങ്ങളുടെ career തിരഞ്ഞെടുക്കുക. ഞങ്ങളുടെ കാലം പോലെ അല്ല. അന്ന് എൻട്രൻസ് അല്ലാതെ ഒരു ഓപ്ഷൻ ഞങ്ങളിൽ പലർക്കും അറിയില്ലായിരുന്നു. ഇന്റർനെറ്റ് ഉപയോഗം ഒന്നും ഇല്ലാതിരുന്ന അക്കാലത്തു, പരിമിതമായ മറ്റു അവസരങ്ങളെ കുറിച്ചുള്ള അറിവുകളിലേക്കു ഞങ്ങൾക്ക് എത്തിപ്പെടാൻ പാടായിരുന്നു.

1 . സ്വകാര്യ മെഡിക്കൽ കോളേജുകളിലേത് അടക്കം ഏകദേശം ഒരു ലക്ഷം എം ബി ബി എസ് സീറ്റുകൾ ആണത്രേ ഇന്ന് ഇന്ത്യയിൽ ഉള്ളത്. അതിൽ തന്നെ അതിന്റെ പകുതി മാത്രമാണ് ഗവണ്മെന്റ് മെഡിക്കൽ കോളേജുകളിൽ ഉള്ളൂ. കേരളത്തിൽ മാത്രം ഏകദേശം 4500 എംബിബിഎസ്‌ സീറ്റുകൾ ഉണ്ട്. ഇതിൽ 1500 സീറ്റുകൾ ഗവണ്മെന്റ് മെഡിക്കൽ കോളേജുകളിൽ ആണ് ഉള്ളത്.

ഇത്രയും അധികം ഡോക്ടർമാർ പഠിച്ചിറങ്ങുമ്പോൾ അവർക്ക് എത്രമാത്രം ജോലി സാധ്യത ഉണ്ട് എന്ന് ആലോചിക്കുക.

2 . മനോരമയിലും മാതൃഭൂമിയിലും ഒക്കെ പറയുന്ന "ഡോക്ടർമാരുടെ എണ്ണം കുറവാണ്" എന്ന പ്രലോഭനങ്ങളിൽ വിശ്വസിക്കുമ്പോൾ ചിന്തിക്കുക. നിങ്ങൾ ഇന്ന് വന്നു പോകുന്ന സ്വകാര്യ ആശുപത്രികളിൽ എത്ര എം ബി ബി എസ് ഡോക്ടർമാർ ഉണ്ട്, അവരെ "വെറും" എം ബി ബി എസ് ഡോക്ടർമാരായി കാണുന്ന സമൂഹത്തിൽ എത്ര ആളുകൾ അവരുടെ അടുത്ത് ചികിത്സക്ക് പോവുന്നുണ്ട്.

അങ്ങനെ "വെറും" എം ബി ബി എസ് ഡോക്ടർമാർ ഇല്ല എന്നല്ല, അത്യാവശ്യം പരിചയ സമ്പന്നരായ, വർഷങ്ങൾക്ക് മുൻപേ ക്ലിനിക്കൽ പ്രാക്ടീസ് തുടങ്ങിയ കുറെ അധികം "വെറും" എം ബി ബി എസുകാർ ജനങ്ങളുടെ വിശ്വാസം ആർജ്ജിച്ചു, പലരുടേയും കുടുംബ ഡോക്ടർമാരായി നമ്മുടെ നാട്ടിൽ ഉണ്ട്.

അങ്ങനെ ആവാൻ ഇനി വരുന്ന തലമുറക്ക്, ഒരുപാട് വിയർക്കേണ്ടിവരും.

3. ഇനി ഗവണ്മെന്റ് ആശുപത്രികളുടെ കാര്യമെടുത്താൽ, കേരളത്തിലെ ഹെൽത്ത് സർവീസിൽ "ഒഴിവുകൾ" ഇല്ല.

സത്യത്തിൽ ഒഴിവുകൾ ഇല്ല എന്നല്ല, അതൊന്നും പി എസ് സി വഴി നികത്താൻ ഗവണ്മെന്റ് തയ്യാറല്ല. പകരം NRHM ഫണ്ട് ഉപയോഗിച്ച് താത്കാലിക കോൺട്രാക്ട് നിയമനങ്ങൾ നടത്തുന്നു.

ഞങ്ങൾ എം ബി ബി എസ് കഴിഞ്ഞിറങ്ങിയ മാസം തന്നെ "അസിസ്റ്റന്റ് സർജൻ" പോസ്റ്റിലേക്ക് പി എസ് സി വിളിച്ചിരുന്നു. അന്ന് ആയിരത്തി അഞ്ഞൂറോളം ഒഴിവുകളും ഒരു വർഷം പഠിച്ചിറങ്ങിയിരുന്നത് വെറും എഴുനൂറോളം ഡോക്ടർമാരും ആയിരുന്നു.

ഇന്നത്തെ അവസ്ഥ എന്താണെന്ന് അറിയുക.

4. "ഡോക്ടർമാരുടെ എണ്ണം കുറവാണ്" എന്ന് മാധ്യമങ്ങളിൽ വായിക്കുന്നത് സത്യം തന്നെയാണ്. ഉത്തരേന്ത്യയിലും നോർത്ത് ഈസ്റ്റിലും ഒന്നും ഗ്രാമപ്രദേശങ്ങളിൽ ജോലി ചെയ്യാൻ ആവശ്യമായത്ര ഡോക്ടർമാർ ഇവിടെ ഇല്ല.

പക്ഷേ, നിങ്ങളിൽ എത്രപേർ അതിനു തയ്യാറാണ് എന്നതൊരു വലിയ ചോദ്യമാണ്. സ്വയം ചോദിക്കേണ്ടതാണ്.

5. സാമൂഹികമായും സാമ്പത്തികമായും തൊഴിൽ പരമായും വിജയിച്ചു നിൽക്കുന്ന ഒരമ്പത് വയസെങ്കിലും കഴിഞ്ഞ മുതിർന്ന ഡോക്ടർമാർ ആണ് പലരുടേയും റോൾ മോഡലുകൾ. അവരെ കണ്ടാണ് പല മാതാപിതാക്കളും തങ്ങളുടെ മക്കളുടെ മേൽ സ്വപ്‌നങ്ങൾ നെയ്യുന്നത്.

അവരൊക്കെ അവരുടെ കഴിവുകൊണ്ടും അവർ വളർന്നു വന്ന സാമൂഹിക സാഹചര്യങ്ങൾ കൊണ്ടും വലിയവരായവർ ആണെന്നും. ഇന്നങ്ങനെ അല്ല എന്നും മനസിലാക്കുക . കേരളത്തിലെ ആദ്യത്തെ ഓൺകോളജിസ്റ്റും ആദ്യത്തെ ലിവർ ട്രാൻസ്‌പ്ലാന്റ് സർജനും ആദ്യത്തെ ഗ്യാസ്‌ട്രോ എൻട്രോളജിസ്റ്റും ആദ്യത്തെ കാർഡിയാക് സർജനും ... അവർക്കൊന്നും പകരക്കാർ ഉണ്ടായിരുന്നില്ല. അവർക്കാവശ്യമായ ഇൻഫ്രാ സ്ട്രക്ചർ ഉണ്ടായിരുന്നില്ല. അവർ തുടങ്ങി വെച്ച വിപ്ലവം അവസരങ്ങൾ ഒരുക്കിയത് പുറകേ വന്ന തലമുറക്കാണ്.

ഞങ്ങൾ ഒക്കെ അങ്ങനെ "താത്കാലികമായി" രക്ഷപ്പെട്ട ഒരു തലമുറയാണ്.

ഇപ്പോൾ തന്നെ സൂപ്പർ സ്പെഷ്യലൈസേഷൻ, സ്പെഷ്യലൈസേഷൻ കഴിഞ്ഞിറങ്ങുന്നവർക്ക് ജില്ല ആസ്ഥാനങ്ങളിലെ പ്രമുഖ ആശുപത്രികളിൽ അവസരങ്ങൾ കുറവാണ്.

സപ്ലൈ കൂടുന്നത് കൊണ്ട് ഡിമാൻഡ് കുറയുകയും അത് സാമ്പത്തിക നേട്ടങ്ങളിൽ പ്രതിഫലിക്കുകയും ചെയ്യുന്നുണ്ട്.

ഇതെല്ലാം നിങ്ങൾ അറിയണം.

6. ഡോക്ടർ എന്ന ജോലിക്ക് ഒരുപാട് "ഡെക്കറേഷനുകൾ" സമൂഹം കൊടുത്തിട്ടുണ്ട്.

"ദൈവം", "ദൈവത്തിന്റെ പ്രതിപുരുഷൻ", "ദൈവത്തിന്റെ കൈ", "റിയൽ ഏഞ്ചൽസ്" ... അങ്ങനെ ഒക്കെ കേട്ട് രോമാഞ്ച കഞ്ചുകമണിയാൻ വേണ്ടി ഈ ജോലി തിരഞ്ഞെടുക്കരുത്.

ചിലപ്പോൾ അടിയും തെറിയും, കത്തിയും കുത്തും ഒക്കെ പ്രതീക്ഷിക്കാം. ഈ അടുത്ത് ഒരു ഡോക്ടറെ കുത്തി കൊലപ്പെടുത്തിയതും ഒക്കെ നിങ്ങൾ അറിയണം.

പേടിക്കേണ്ട, ജാഗ്രത വേണം എന്നേ ഞാൻ ഉദ്ദേശിച്ചുള്ളൂ.

ഇത്രയും മനസിലാക്കുക; ഡോക്ടർ എന്നാൽ ഒരു മനുഷ്യൻ മാത്രമാണ്. ശാസ്ത്രത്തിന്റെ സഹായത്തോടെ അസുഖങ്ങളെ ചികിൽസിക്കുകയും ആ അവസ്ഥകളെ കുറിച്ച് രോഗിയെ പഠിപ്പിക്കുകയും ചെയ്യുന്ന ഒരു മനുഷ്യൻ.

മാജിക്കുകളും മിറക്കിളുകളും സിനിമയിലും പുസ്തകങ്ങളിലും ഭാവനയിലും മാത്രമേ സംഭവിക്കൂ.

7. നമ്മുടെ രാജ്യത്തു പഠിച്ചത് പ്രാക്റ്റീസ് ചെയ്യാൻ കഴിയുന്ന അപൂർവ്വം ജോലികളിൽ ഒന്നാണ് ഡോക്ടർ ജോലി.
ഈ ജോലി തരുന്ന ആത്മ സംതൃപ്തി വേറെ ലെവൽ ആണ്. വേദനിക്കുന്ന ഒരാൾക്ക് ഒരു ഗുളികയോ ഇഞ്ചക്ഷനോ കൊടുത്തു, വേദന മാറി അയാൾ ചിരിക്കുന്ന ഒരു റിയാക്ഷൻ ഉണ്ടല്ലോ.

ആ ഫീൽ അത് വേറെ തന്നെയാണ്.

അപ്പോൾ കാൻസറും, ഹൃദ്രോഗങ്ങളും പോലെ ഉള്ള ഭീകര അസുഖങ്ങൾ മാറിയവരുടെ "ചിരി" തരുന്ന ആത്മ സംതൃപ്തി അതൊന്നു ആലോചിച്ചു നോക്കൂ.

ചിലപ്പോൾ ബാക്കിയായി ഈ ആത്മ സംതൃപ്തി മാത്രമേ കാണൂ.

എന്നാലും അതാഗ്രഹിക്കുന്നവർക്ക് വേണ്ടി, അതിനു വേണ്ടി ഏതറ്റവും പോവാൻ താല്പര്യമുള്ളവർക്ക് വേണ്ടി ആണീ പ്രൊഫഷൻ.

അല്ലാതെ എൻട്രൻസിൽ കള്ളത്തരം കാണിച്ചു വരുന്നവരും മറ്റു സ്വാർത്ഥ താല്പര്യങ്ങൾ ഉള്ളവരും ഒന്നും വലിയ വിജയം കാണാത്തത് ഈ ഒരു പാഷനും ഡെഡിക്കേഷനും ഇല്ലാത്തതു കൊണ്ടു കൂടിയാണ്.

8. ചിലപ്പോൾ നിങ്ങൾക്ക് "ആത്മസംതൃപ്തി" ആവോളം കിട്ടും, പക്ഷേ രോഗിക്ക് സംതൃപ്തി കിട്ടാത്ത അവസരങ്ങളും നേരിടേണ്ടി വരും. അതൊരു ബുദ്ധിമുട്ടുള്ള അവസ്ഥയാണ്.

9. ചിലപ്പോൾ നിങ്ങൾ പഠിച്ച ശാസ്ത്രവും മരുന്നുകളും ഒക്കെ നിസ്സാഹായരാവുന്ന അവസരങ്ങളും വരും. നിങ്ങളുടെ കയ്യിലൂടെ , കണ്ണിന്റെ മുൻപിലൂടെ ജീവൻ പോവുന്നത് കാണാം. നിങ്ങളുടെ ആത്മാർത്ഥത കൊണ്ടൊന്നും ഒരു കാര്യവുമില്ലാത്ത സമയം.

നിങ്ങൾ വെറും മനുഷ്യൻ ആണെന്നും ദൈവം എന്ന് പറയുന്നത് വെറും ഡെക്കറേഷൻ ആണെന്നും തിരിച്ചറിയുന്ന സമയം.

10. ഇനി പഠിക്കുന്ന കാര്യം. ലോകത്തിലെ തന്നെ ഏറ്റവും വലിയ സിലബസ് "എം ബി ബി എസ്" നാണത്രെ. മാത്രമല്ല, മനുഷ്യനെ കുറിച്ച് നിങ്ങൾ എത്ര പഠിച്ചാലും അത് തീരില്ല. ഓരോ മനുഷ്യനും വ്യത്യസ്തൻ ആണെന്നറിയുക.

"എം ബി ബി എസ്" വിദ്യാർത്ഥിക്ക് കിട്ടുന്ന പരിഗണനയൊന്നും പാസായി കഴിഞ്ഞാൽ കിട്ടില്ല. പിന്നെ നിങ്ങൾ "വെറും എം ബി ബി എസ്" ആയി. അഞ്ചര കൊല്ലത്തെ പഠനവും ഹൌസ് സർജൻസിയും കഴിഞ്ഞു "എന്തൊക്കെയോ" സംഭവം ആയി എന്ന് നിങ്ങൾ വിചാരിക്കും. പക്ഷേ, സമൂഹം ആ "വെറും" എന്ന വാക്ക് കൊണ്ട് നിങ്ങളെ സ്വീകരിക്കും.

അത് കൊണ്ടെന്താ, കേരളത്തിൽ നിന്നും പുറത്തു വരുന്ന 4500 ഡോക്ടർമാർ, കേരളത്തിന് പുറത്തും റഷ്യയിലും ചൈനയിലും ഒക്കെ പഠിച്ചു വരുന്ന വേറെയും ആയിരത്തിലധികം ഡോക്ടർമാർ ഒക്കെ "പി ജി എൻട്രൻസ്" കോച്ചിങ് സെന്ററുകളിൽ ആണ്. വീണ്ടും എൻട്രൻസ് പഠിത്തം. എം ബി ബി എസിനെ അപേക്ഷിച്ചു സീറ്റുകൾ വളരെ കുറവായിരിക്കും പി ജി ക്ക് എന്നറിയാമല്ലോ.

ഒരേ ഒരു കാര്യം പി ജി ക്കു ഗവണ്മെന്റ് കോളേജിൽ അഡ്മിഷൻ കിട്ടിയാൽ വീട്ടുകാരുടെ കയ്യിൽ നിന്നും കാശ് വാങ്ങേണ്ടി വരില്ല. ജീവിക്കാനുള്ള കാശ് സ്റ്റൈപ്പെന്റ്റ് ആയി കിട്ടും.

പി ജി എന്നാൽ മൂന്നു കൊല്ലം.

അത് കഴിഞ്ഞു വീണ്ടും എൻട്രൻസ് എഴുതിയാലേ കാർഡിയോളജി, ഓൺകോളജി, നെഫ്രോളജി , യൂറോളജി , ഗ്യാസ്‌ട്രോ,ന്യൂറോ ... അങ്ങനെ സൂപ്പർ സ്പെഷ്യലൈസേഷന് അഡ്മിഷൻ കിട്ടൂ.

അതും മൂന്നു വർഷം.

ഇതിനിടയിൽ ഓരോ കോഴ്സ് കഴിയുമ്പോഴും ഒരു വർഷം/ മൂന്നു വർഷം അങ്ങനെ നിർബന്ധിത സേവനവും ഉണ്ട്.

ഇതൊക്കെ കഴിഞ്ഞു "ജോലി" കിട്ടുമ്പോഴേക്കും മുപ്പത് / മുപ്പത്തഞ്ചു വയസ്സാവും.

മറ്റു പ്രൊഫഷൻ എടുത്ത പലരും റിട്ടയർമെന്റിനെ കുറിച്ചും പെൻഷൻ സ്കീമിനെ കുറിച്ചും സംസാരിക്കുകയും ആകുലപ്പെടുകയും ചെയ്യുമ്പോൾ നിങ്ങൾ നിങ്ങളുടെ ഡോക്ടർ ജീവിതത്തിന്റെ ശൈശവാവസ്ഥയിൽ നാളെയെ കുറിച്ച് സ്വപ്നം കാണുക ആയിരിക്കും.

11. ഈ പി ജി പഠിത്തം, സൂപ്പർ സ്പെഷ്യലൈസേഷൻ പഠിത്തം എന്നതൊക്കെ അടിമപ്പണിയുടെ കാലം കൂടിയാണ്. നാല്പത്തി എട്ടു മണിക്കൂറും എഴുപത്തി രണ്ടു മണിക്കൂറും ഒക്കെ ഉറക്കമില്ലാത്ത തുടർച്ചയായ ഡ്യൂട്ടികൾ നിങ്ങളെ കാത്തിരിക്കുന്നുണ്ട്.

ഇതിനൊന്നും നമ്മുടെ നാട്ടിൽ യാതൊരു വ്യവസ്ഥിതിയും ഇല്ല. കൂടുതൽ പണി എടുക്കുന്നവന് കൂടുതൽ എക്സ്പീരിയൻസ് കിട്ടും. ഈ അടുത്ത കാലത്തൊന്നും ഇതൊന്നും മാറും എന്നും പ്രതീക്ഷിക്കേണ്ട.

13 . ഇതൊക്കെ കഴിഞ്ഞു നമ്മുടെ ദാസനും വിജയനും പറഞ്ഞത് പോലെ "നമുക്കൊന്ന് സുഖിക്കണം" എന്ന ദിവാസ്വപ്നവും കണ്ട് നിങ്ങൾ ജോലിക്കു കേറും. അപ്പോൾ അവിടെ അപ്പൂപ്പന്മാരും മുത്തശ്ശന്മാരും ആയും പല ഡോക്ടർമാരും നിങ്ങളെ ഭരിക്കും. റിട്ടയർമെന്റ് ഇല്ലാത്ത ഒരു ജോലിയാണിത്. റൊണാൾഡോയും മെസ്സിയും കോഹ്‌ലിയും രോഹിതുമൊക്കെ റിട്ടയർ ചെയ്തു, ന്യൂ ജനറേഷന് അവസരമൊരുക്കുന്നത് പോലെ ആരും നിങ്ങൾക്ക് അവസരങ്ങൾ തരില്ല.

14 . ഇനി പെൺകുട്ടികൾക്ക് മാത്രമുള്ള ഒരു റിസ്ക്ക് ആണ്. നമ്മുടെ സാമൂഹിക സാമ്പത്തിക സമൂഹത്തിൽ നിങ്ങൾ ഒരു ഡോക്ടർ ആയി പരിണമിക്കുന്നതിനിടയിലാണ് "കല്യാണം", "പ്രസവം", "കുട്ടികളെ വളർത്തൽ" പോലുള്ള ഉത്തരവാദിത്തങ്ങൾ നിങ്ങളെ കാത്തിരിക്കുന്നത്. എത്ര കൈകൾ കൊണ്ട് ഇതൊക്കെ ചെയ്യാൻ പറ്റും, എത്രത്തോളം ഇച്ഛാശക്തിയും സ്ഥിരോത്സാഹവും കഠിനാധ്വാനം ചെയ്യാനുള്ള മനസ്സും എന്നൊക്കെ പരീക്ഷിക്കപ്പെടുന്ന കാലം.

15 . ഏറ്റവും കൂടുതൽ ആത്മാർത്ഥത ഉണ്ടാവേണ്ടുന്ന, ആ ആത്മാർത്ഥത സമൂഹം പ്രതീക്ഷിക്കുന്ന ഒരു ജോലിയാണിത്. നിങ്ങൾ കൂടുതൽ തിരക്കുള്ളവൻ ആവുമ്പോൾ, കൂടുതൽ രോഗികളെ ചികിൽസിക്കുമ്പോൾ നിങ്ങളുടെ ഉത്തരവാദിത്തവും കൂടും. ഇന്ത്യയിലെ ഡോക്ടർമാർക്കൊന്നും പ്രത്യേകിച്ച് സ്വകാര്യ മേഖലയിൽ ഡ്യൂട്ടി HOURS ഇല്ല. നിങ്ങൾ മുഴുവൻ സമയവും ഡ്യൂട്ടിയിലാണ്, അല്ലെങ്കിൽ ഓൺ കാൾ ആണ്. നിങ്ങളുടെ സേവനം ആവശ്യമായ ഒരു രോഗി എത്തിയിട്ടുണ്ടെങ്കിൽ, അതൊരു എമർജൻസി ആണെങ്കിൽ നിങ്ങൾ അവിടെ എത്താൻ ബാധ്യസ്ഥൻ ആണ്.
( ഇങ്ങനെ എമർജൻസി ആയി ആശുപത്രിയിലേക്ക് പോവുമ്പോൾ, നിങ്ങൾ ബ്ലോക്കിൽ പെട്ടാൽ ആരും നിങ്ങളെ മൈൻഡ് ആക്കില്ല. യാതൊരു പ്രിവിലേജും തരില്ല. നിങ്ങൾ ചികിൽസിക്കേണ്ടുന്ന രോഗിയുള്ള ആംബുലൻസിന് കിട്ടുന്ന പരിഗണന കിട്ടും.)

നിങ്ങൾ കണ്ട നേട്ടങ്ങൾക്കും ഗുണങ്ങൾക്കുമൊപ്പം ഇത്രയെങ്കിലും കാര്യങ്ങൾ ഈ ജോലിയെ കുറിച്ച് നിങ്ങൾ അറിയണം. അത്രയും പാഷൻ നിങ്ങൾക്കുണ്ടോ എന്നും വേറെ അവസരങ്ങളിൽ ഇതിനേക്കാൾ ശോഭിക്കാൻ നിങ്ങൾക്ക് കഴിയുമോ എന്നും ചിന്തിക്കുക.

നിങ്ങളുടെ ഭാവി തീരുമാനിക്കുന്നത് നിങ്ങളാണ്, നിങ്ങൾ മാത്രമാണ്.

Dr Santhosh Kumar N

‍